Ich bi sehr ä frehlichä Mensch und lachä fir miis Läbä gärä.
Nach miinerä Lehr als Schriineri, han ich im 2019 ä Diplomlehrgang Fotografie bsuächt. Ich ha ganz viel niiws derfä lehrä und cha miis Wissä immer wider bruichä. Sit em 2022 duäd mich diä liäb Nina Kälin uf miim Wäg begleitä und ich darf immer wider ganz viel vo ihrä lehrä.
Im Juli 1997 bin ich uf d Wält cho und ha mit miinä zwei elterä Schwesterä z St.Niklausen derfä ufem Buirähof vo miinä Elterä ä wunderbari Chindheit erläbä und ganz viel lerä. Jetzt wohn ich mit miim Frind zämä z Chärns, amnä sehr scheenä Plätzli.
Am liäbstä bin ich i dr Natuir. Mä trifft mich bim Wanderä i dr Bärgä und im Winter duän ich gärä d Pistä ab flitzä. Einisch i dr Wuchä han ich Prob und darf midemä super lustigä Jodlercheerli juitzä und lachä.
Ich bi sehr ä frehlichä Mensch und lachä fir miis Läbä gärä, ai wenns Läbä nid immer nur Sunnäschiin bring probiär ich immer s Positivä z gsee und bi dankbar fir all das.
Wenn viel Arbet ahstaad gfind mä mich ai bi miinä Elterä ufem Betrieb, da duäni sehr gärä hälfä. Bodäständigkeit passt ai guäd zu miär, ich liäbä s Läbä hiä ufem Land und alles was so drzuä gheerd. Ich bi unkompliziärt und spontan, nimmäs so wiäs chund.
